*شعب ايقوده شهيد

*شعب ايقوده شهيد
ميسون نعيم الرومي

-(شعب قافل ع القضية) – يطرد الفاشي الجديد
يا عـراقي اويا مجـيـد – (شـعب ايقوده شهيد)-
ابدمهه ضحـَّـت هالشباب – رايه شـَدَّت بالوريد
مـِـيـْتْ يوم الشعب صامد – ايعيش يرفض كالعبيد
بسمك اوصاحوا عراق – شاب،شايب،وي وليد
لا تــَحـَـزّب لا تـَكـَـتـل – مانـريـد اولا نـريـد
كلنه واحد تحت رايه – راية الشـعب العتـيـد
الموت ايخافك يا عراق – صامد انت كالحديد
انريد حقنه انـْـزَلنـْه كلنه – عامل اوفلاح،طالب شديد
شعب قرر سلطه تسقط – والشعب رأيه سديد
چنـَّه أول صرنه تالي – احـْكـَمـْـنـَه سافل والبليد
باگوا افلوس العراق – والشعب اصبح شريد
درَّة الشرق العظيمه – حاضرة (بغداد) الرشيد
ما نخاف اولا نهاب – نبني مسـتقبـَـل سـعـيـد
*(كـِتـْلوا عشره كـِـتـْلوا ميـَّه) – عن عزمنه ما نحيد
النصر إلنه قريـب – والنصر حتما أكيـد
*(شعب قافل ع القضية)- (شعب ايقوده شهيد)-
——————————————————
*شعب ايقوده شهيد:- من أهازيج المتظاهرين في الساحات
*شعب قافل ع القضية:- من أهازيج المتظاهرين في الساحات
*كـِتـْلوا عشره كـِـتـْلوا ميـَّه:- من أهازيج المتظاهرين في الساحات
————————————————————————-
1/آذار/2020
ســـــــــــــــــتوكهولم