تـِـبـْـقــَه صغـيـر
ميسون نعيم الرومي
تبقه (صغـيـر) اوأبد ماتكـبـر
يابو (النستله) وافلوسك التكثر
تلطم ع (الحسين) ؟ وامتلتله الثروات
حتى اعله (الحسين) اتريد تتقشمر؟
الثار اعله الظلم والناده بالإصلاح
منكم بريء اومبتري ياجوگة القشمر
***
بعتوا العراق ابرخص واسرقتوا بالثروات
ذليتوا (الشعـب) والشعب ما يغـفـر
أطفال اتيتمت نسوان تبچي اتنوح
-(ارميتوا) بالشباب الدمهم اتطشر
اسجون امترسه والمنهم (الأحداث)-
صارت تجاره بالبشر، والأهل تتهجر
***
نصرف ع الدول والشعب كله ايلوع
جوع اوبطاله اومرض، يوميه هالتكثر
راح الوطن هالگعد ع الرنگات
احزاب امعدده، شغلتهه بس (تهـبـر)-
لا كهربه لا ماي لامشفه لاخدمات
تموز اللهب يشوي شوي، والناس تتجمر
***
بگـتوا بالنفـط والماي هم بعـتـوه
-(دجله اوفرات) النشف، والبلد يتصحر
هذا (العراق) اليزهي ابو الثروات
صايـر مزبله والشعـب (متخدر)-
راح الطاغيه، وافرحنه كلش حيل
جانه ابغفل البعمامته وابجبه يتستر
***
افلوسك تنسرق (اوليداتك) التشبع موت
حر اوقـَهـر، والكهربه بالعـَـمد تتفجر
شنهي اليحركك يا (شعب).. بسك ذل!
ضيم اومهانه اوعطش، والحاكم اتنمر
تلطم ع (الحسين) ؟ وامتلتله الثروات
يابو النستـله وافلوسـك التكثر
——————————————-
5 / تموز/ 2021
ســـــــــــــــــــتوكهولم
تـِـبـْـقــَه صغـيـر
Related Posts
مقال
غياب الثوابت الوطنية يفاقم النزاعات . العراق انموذجا ادهم ابراهيم الثوابت الوطنية هي مجموعة من القيم والمبادئ الاساسية التي تربط أفراد المجتمع وتجمعهم تحت راية واحدة تتمثل فيها الهوية الوطنية،…
بغديدا السريانية تستقبل ميلاد طفل المِذود بالثوب الأسود .. ولد المسيح ..هاليلويا .. ܝܠܕܐ ܒܪܝܟܐ
بغديدا السريانية تستقبل ميلاد طفل المِذود بالثوب الأسود .. ولد المسيح ..هاليلويا .. ܝܠܕܐ ܒܪܝܟܐ بِقلم : وسام موميكا_المانيا ܀ “لأَنَّهُ يُولَدُ لَنَا وَلَدٌ وَنُعْطَى ابْنًا، وَتَكُونُ الرِّيَاسَةُ عَلَى كَتِفِهِ،…