طايـح حايـطـْـنـَه اومـَــربـود

طايـح حايـطـْـنـَه اومـَــربـود
ميسون نعيم الرومي

لا بـي نَـفـْع … اولا بـي فـود ـ طايـح حايـطـْـنـَه اومـَــربـود
نـوّاب اوتـكـرف واتـمـَـلـْيـِـن ـ امْــكـَـرّش واحـدهـم مَـلغـود
إهـدَمـْـتـوا (البـنـيـَـه الـتـحتـيـّـه) ـ ماظل عالم .. ما .. موجود
جوعان الشعب اوساكت ـ امخـَيـطـينـَه الحَلگـَه اومَسـدود
ريسنه :- اتهده اشويه ـ لا تـنـْـسـَـه اوتعبر لحدود
اشـمـالك (تتصور) مهووس؟ ـ اتفتش ع المجد المَوعـود؟
لا توعد ! ع الناس اتچذب ـ لعلام الغشك ما محمود
ابچذباتك وامصدگ فرحان – امقشمر روحك يا مگرود
علگلك خرزه اوسبع اعيون ـ خافَـنـَّه ايـحـسـدَك حـاسـود
ريشك نافخ چن طاووس – مسؤول ابجرم المشهود
لحزاب اتقودك وامكيف – لازگ ع الكرسي المنكود
حسبالك تفلت شعليك ؟؟ – الأول انت ! اوللدوله اتقود
احسبهه اوفك عينك..إصحه – وصلوك الدرب المسدود
تاريـخ اقـراه اتمعن – ماتـلحگ تعـبـر الحـدود
تتركب كلهه ابـراسـك – واتصير انت المصيود
لا بـي نَـفـْع اولا بـي فـود ـ طايـح حايـطـْـنـَه اومـَــربـود
————————————————————
ســــــــــــــــــــــتوكهولم
2/تموز/2021

اترك تعليقاً

لن يتم نشر عنوان بريدك الإلكتروني.