حامي الحـِـمـَه

حامي الحـِـمـَه
ميسون نعيم الرومي

نص الشباب امكبسله
دمروا ولدنه السفله
-(صالح)(الكاظمي) حامي الحمه
صفقة فساد امعدّلـَه
تاجر مخدرات ايحرره
واچماله (ضابط) يا هله
ابن (المحافظ) هرَّبـَه
-(دستور) صاير مهزله
***
لـمـَّوا شباب ابلا ذنب
لسجون بيهه امتلتله
تنظر بامرهم واجبك
والمنهم بريء اتكفـَـله
يا ويلي يا ولد الخايـِـبـَه
صرتوا سلع بيع اوشره
امصايب أبد ما تنحچي
مشتركه كلهه بالجره
***
أغنه بـلد بالمنطقه
-(اعراقنه) الصاير مزبله
لا شارع امبلط لا مدرسه
لا مشفه لا خدمات..جاكم بله
-(ملياردير) واحدكم صفه
البوك ياهــو الحلله؟؟؟
كلمن (امغلس) منتچي
حصته ضمنهه امكملله
***
ترفل ولدكم بالدول
بالخير متنعمه امدلله
ولد الشعب عيني امحسره
شفــتـوا عداله امظلله ؟
شهادات كلهه امزوره
خيبتكم چبيره امجلجله
لحســاب باچـر يجي
روح اقره (تاريخ) اسأله
روح اقره (تاريخ) اسأله
———————————-
3/آذار/2022
ســــــــــــتوكهولم

اترك تعليقاً

لن يتم نشر عنوان بريدك الإلكتروني.