العيد راح اوهم إجه !!

العيد راح اوهم إجه !!
ميسون نعيم الرومي

تتخايل اگبالي نجم
والسمه سـِـكـَّة سـفر
تتخايل ابگلبي گمـر
والغيمه مستحيه تمر
الليل لون الكحل
وآنه حاصرني المطر
واسنيني تعبهه السـفر
لاهانت .. اولا فاد الصبر
وينه الصبر
***
چم عيد راح اوهم إجه
ماشفنه فرحه اولا أمل
بطلنه نحلم..والحلم فزّ اونفر
مرّ الشته..اوجانه شته
والصيف راح اوهم گضه
واسنين انطوت ويه العمر
ما شفنه .. غير الغدر
وايام تعبهه الصبر
ليوين .. بسك تنتظر!!
بسك حزن .. كافي قهر
كافي قهر
***
اتخايلك گمره اوربيع
والطيرغـَـنـَّه والعندليب
واشموع فرحتنه ضوت
واعيون ضحكتنه فجر
اوجوه فرحانه إجت
اموشحه ابخيط الشمس
واسمع الناي العـِـزَف
يتناغه وي موج النهر
ياروحي .. چن طال الحلم
ظلمه اونسانه البدر
واعيون تربي تضل
واللعبه چن لعبة قدر
لعبة قدر….
———————————
1 / نوفمبر / 2021
ســــــــــــــتوكهولم

اترك تعليقاً

لن يتم نشر عنوان بريدك الإلكتروني.