تجاوز المحتوى

ابرة الكورونه

ابرة الكورونه
ميسون نعيم الرومي

كورونه اللفتنه *(العام) سوتنه طشار
كلمن كرصله ابدار يسمع بالاخبار

يسمع خبر كل يوم يتراجف ايگوم
مايدري وين ايريد يگضيهه بالنوم

ابنومه يحلم بيه طالعله (كوفيد)-
وامشندخ الذرعان كل طـِبـَّـه متفيد

طرگاعه اجت كوفيد وامنين اجانه
هد اوهجم بسـكوت بـَـلوه اوبلانـَـه

تـَعـَّـبـنه (هالكوفيد) ثانـيـله ركبـَه
امحزم علينه احزام (هزلنه) رگبه

امحزم ايموت الناس منهو اللي سوّاه
تهموهه گالو (صين) فيروسه ودّاه

بلوه ابتلينه (الصين) تاكل (خفافيش)-
صرصر اودود الگاع والمچسي بالريش

هـَـب العـِـلـِم هاليـوم يـنـقـِـذ العالم
-(كادر الطبي) انريد كل وكته سالم

و(العالـِـم) ابهاليوم ثروه اوأملنه
كل الوكت سهران ينقذ (كـُـرَتـْـنـَه)*

اخترعوْ (الفاكسين) كل بلد بي نـوع
صار اللغط والگول والوادم اتلوع

واحد يگول اشلون..ما اضرب ابره!
والثاني بـيـه ايـلوم حايـر ابأمـْـرَه

واشتغلت الأقلام كتبت اشـاعـات
-(بتويتر اوفسبوك) علگوْ الرايات

كلمن ضميره ايگـول يتبـَرّع اخبار
صدگ اوچذب اقوال والبشرمحتار

حرنه يربي اشـلون هاذي مصيبه
موت اوخراب ابيوت كلمن نصيبه

قـَـرَّرِت آنـَه اليـوم اضرب الأبره
وادعي على *(الكوفيد) يحترگ أمره

يحيا (العلم) نبراس يضوي ابدربنه
و(العالـِـم) طليعه اليوم شـمعـه ابدربنه
————————————–
*(العام):-السنة الماضية
* كـُـرَتـْـنـَه:- اقصد الكرة الأرضية
*(الكوفيد):-كوفيد19 فايروس الكورونا
——————————————————
27/ ديسمبر/2020
ســـــــــــــــــــتوكهولم

Published inاراء

كن أول من ‫يعلق على المقالة

اترك تعليقاً

لن يتم نشر عنوان بريدك الإلكتروني.